Letras livris
Nes pagina nu ta publika riflisom, storias e poesias di autoris diversus e muita vezis di forma anomima. Letras livris ta permiti kualker um di nos xpressi nos imaginasom, nos frustrasom, nos lisom di vida, nos inspirasom. E forma di da vida e dá voz a um juventudi ki sta prokura sentidu mum mundo di txeu kontradisom. E uma forma di da kontribuisom pa ultrapassa bareiras di nos kondisom e infrenta disafu di nos epoka.
So pa diskontrai…
Maratona di meta fradu
Mundu kuntinua nes maratona furadu, Ku meta trasadu, mas ku tenpu ilimitadu. Partida pitadu, mas limiti ka indikadu; Atiletas ka konxi itenerariu markadu.
Busula sta stragadu, GPS dja blokiadu, Internet kodifikadu inda ka sta sertu ken ke kulpadu; Torsidas dja fika prekupadu.
Di norti pa sul stadu disorentadu, tudu prekupadu ku atxa kulpadu, pamodi si non meta ka ta txigadu, nen korida ka ta paradu.
Si ten kulpadu inda ka fladu, si dja atxadu inda ka mostradu, si kumesa buskadu ten ki atxadu, mesmu ki ka atxadu konsikuensia ta asumidu.
Maratona ku meta furadu, Atiletas tudu kansadu, Meta inda ka divulgadu, Pamodi kada strateja sta trasadu.
Maratona di meta furadu, Mas kantu fika pa matadu? Rikezas pa guardadu? Poder pa puderadu? Economia bira maratona furadu, pandemia foi rikezas kondisionadu, Atiletas é RH sploradu,
Meta ta ben ser divulgadu. Si meta markadu, Ten algu ki ka ta guardadu, Ten poder ki ta perdedu, Ten konsikuensia pa pagadu. Maratona ku meta furadu, Teni si dias kontadu, Mesmu ki ka ta kredu ô setadu, ten uniku donu di mundu, ki ta tomá konta di túd.
@Badiu de pe ratxadu
Sinismu di boka kaladu
Fika na kaza kontu nobu di stadu, Familias na kaza trankadu, tudu preukupadu,
Es skeci ma si ka ten kumida ka ta kumedu. Txeu familia sta dizorentadu, maltratadu y injuriadu, na kuze kes ta pega, si nada es ka sa ta dadu.
Pa ken ki sta inganadu, pe tra si kabalu di txuba pmd dje sta modjadu. Informason di verdadi ka sa ta dadu, Pamodi e td mintira kel ki na midia sa ta dadu. Notisia ta distorsedu, populason fadigadu. Jornalistas tromentadu governantes tudu fogadu
Mon di bolsu ka kre tradu Pobri fla na txon ka ta panhadu, ken ki teni dise-l sta guardadu. Agoh tudu porta fitxadu Palavra di stadu ten ki kunpridu
Disisu sa ta ben odjadu Mesmu ki sa ta konbatedu Kes fingi sta kontroladu es mesmu ki sta nganadu Pamodi analfabetismu dja sta ultrapasadu, Mesmu kes atxa ki tudu alguen teni odju fitxadu,
Mas é tudu sinismu êz boka kaladu Nu ka mesti preukupa, biblia flaba nu sta avizadu, profesias sta kuasi tudu kunpridu.
Nu ten nos irmon ki mesti ser konsoladu, di porta fitxadu dizanimadu. Pior ki duensa e vivi perturbadu, Ta buska soluson ku opurtunidadi inseradu, Alternativa dja blokiadu, koitadu, fadigadu, prekupadu, disiludidu di menti kansadu y frustradu ku tenpu stipuladu.
Txuba ka txobi, di azagua nada ka tradu, Midia ta publisita pa ingana menti tapadu, Nhos diskulpan verdadi ten* fladu, Mintira ki kontadu é tudu pekadu.
Si porta ka abridu, ki planus mas un bes foi fadjadu, ki promesas ka kunpridu disisu ta odjadu. Min sta prekupadu ku nhas povus ke koitadu Sen nada pega nel, vivi tirsidjadu koitadu, Mi nada nka teni pan dividi nen pan da pistadu.
Nhos fazi sima Jeová Deus teni na bíblia skrebedu, Nhos ben pa mi nhos ki sta kansadu y oprimidu, ka nhos ten dúvida ki tudu ta ser kunpridu, nunka NHORDES dexa se povu frontadu, Nunka el dexanu inganadu tudu Ke-l ten fladu nos, E-l ten kunpridu.
Na orason nhos nu manti senpri unidu, so asi nos luta ta ser vensidu
@ Badiu di pe ratxadu
Em kriolu 