É urgenti tenta percebi uki sta passa e da nos contribuisom.

Kriol 2030, dja é nova lema ki governu sta promovi, um kriolu ku garantia di acesso a internet, consideradu um bem essential. Um kriolu envolvidu na smart agricultura. Um kriolu ator na fintech. Ki ta vive na cidade inteligenti. Ki ta usufrui di energia smart. Até ki podi gosta di jogus online. Ki ta usufrui di servisu di e-governança. Ki ta tra proveitu di tecnologias no setor di turismo, di pesca, di cultura. Kriolu 2030 ta beneficia de segurança pa realiza sé transação na internet. E ta podi até recori a justiça online! Em fim, um kriolu smart!

Es fla mé possivel, pa nu acredita! Sera kes sta acredita mesmu? Ou é mas um forma di mostra ma Cabo Verde também sabi sigui movimentu global? E tão confortavel di copia, cola e da uns tokinho pa ladu, pa ka fladu ma ka sta adaptadu a nos realidadi.

Nta aprova sim passos pa frenti, um visom pa futuru, ambição pa poe nos terra riba la. Mas modi nu ta txiga là sem nos povu? Modi nu ta txiga la, se ku sta integras desdi primeira reflissom na desenhu di kel futuro. Sera ki so konfronta nos ideias ku pessoas di nos zona di konfortu é suficienti pa legitima kel projetu? Sera ki ka é momentu di nu abri realmenti espaço demokratiku pa povu! Kel ki muita vez ta konsideradu menus edukadu?

Na nha intender, solusom pa dizafiu di Cabo Verde ka podi ser pensadu so aplikandu solusom global.

Nu tem ki desenha localmenti solusom pa problemas di nos terra. Ku pé finkadu na nos realidadi!

Nu tem ki pensa ku maioria e não so ku alguns peritus ki konxi nos realidadi so di forma artificial.

Nos, juvendi na país e na diaspora é pa nu mostra nos ousadia e pa nu atrevi interveni nes processu. Nos future é nos ki ta skrevi! É urgenti tenta percebi uki sta passa e da nos contribuisom. Ka nhos nu dexas bendenu sonhus; nhos nu sunha djuntu, mas cordadu e nu aji pa realiza nos projetu di sonhu! So assim talvez realidadi ki nu ta bem vivi na 2030 ta podi aproxima di kel ki nu ta consigui imagina.

Kasu nu fadja na realmenti involvi povu na pensa Cabo Verde di manhã, kel kriolu 2030 ki sta sunhadu, so podi bem existi num realidadi virtual!

Ja ki agora é possivel konstrui sonhus em realidadi virtual.