Amor komu expresom mais simplis di Verdadi…
Era um dia di txuba, kel txuba de agua quente. Suavementi na peli. Kel dia, Amor staba bistido de kor branku. Um bistidu lindissimo. Resplendenti. Sé forma ta parceba claramenti na vista de tudo. Kel dia, uma figura eleganti passa frenti sé porta. Um oliar pa kel joia branca. Um pisca de olho pa ladu. Amor mandal kel surizo. Um surizo tao contagioso ki kel charmoso ka xinti né coragem di mandal di volta.
Kel figura xinte um pouco incomodadu ku tanta beleza. E poe rostu pa ladu e continua sé caminho.
Dos porta dipos é passa frenti casa di Prazer. E cubri sé cara. Ku luneta na odjo é konku na porta. Sem spera pé fladu pé entra, é da kel passo virulenti pa sala di jogu, sala di dansos e di aventuras. Na kel momento é usufrui di um momento di puro relaxamento, di grandi euforia. É kurti kel momento sima ké era ultimus di sé existencia. Na sé pensamento, staba sempri kel doci imagi da criatura nuvem. É sim ké ta txomal, a joia branca, sé Amor, sé criatura nuvem.
Tempo passa. Dias ta bai, dias ta bem. Amor na janela ta ouserba aventureiros na casa visinho. Kel dia, é decidi bai odja realmenti uki sta passa pa la. Anti dé txiga, é odja kel figura de fatu, ku kel postura di basofaria, ta bem. Ki elegancia !
“Ohh… Kré djam sta gosta ?”
Infelizmente, Verdadi passa na el, ka dal nehuma olhar, nehum sinal.
« Pamodi ki hoje ném um pisca. Mi ki dja tinha priparu kel sorizu… kel sorizu ki ta sombral… »
Verdadi xinti tao vergonhoso, ké anda faxi e disaparece pa beku.
Amor ka percebi kusé ki sta passa. E da kosta a kel casa di Prazer e volta pa sé lar.
« Hoje djam decepciona. Kusé ki ka sta dretu ku mim ? Pamodi tanta genti sta prifiri passa tempo ku Prazer, e mim nehum atensom ? »
Amor fika ta matuta.
« Serà ki nha forma di vivi ka ta conformas ? Nha forma di expressa ka sta agradas ? Nha casa ka sta acolhedor ? Mim ki trabalha tudo aspeto di nha existencia, pam ka dexa nada nem ninguem di ladu. Mim ki sempri ta sta na ses bera, ta das kes abraços, na momento di tristesa, di solidao, di disputa. Pamodi ki ninguem ka sta cré dan kel atensom ? Ki nimguem ka sta cré cuida di mim ? Sera ké pa expressa sima Prazer ? »
Amor sta pensa ainda.
«Pam manxi fazi barulho ? Pam manxi bendi nha essencia? Pam kurti momentus? Pam pensa so na nha fisico? So na materia? So na dinheiro? Pam da nha tempo pa pedisom? Sera kim nka bali mutu mas di ki isso ? Sera ki um dia pelo menu nka ta kontra ku nha grandi Verdadi ? »
Amor konclui sé reflisom. « Verdadi, ka bu skessi ma pa bu vivi, bu mesti Amor. E unico espaço pa bu podi realmenti ser bo. »
Dias passa. Hoje é dia di txeu bentu e strubada. Dja anunciado tempestadi. Casa di Prazer dja fitcha ku kes ki dja staba dentu. Verdadi staba na caminho pa la quando é panha um xoki. E da na txom bruskamenti. Kes di casa Prazer obi kel critu e nem ka liga.
Amor staba mas um bez na janela. E assisti tudo scena.
« Sera ké pam bai socorel ? »
« Ki pergunta é essa ? Dja bu sta cré dexa bu menti corompi ? Korri faxi bu bai odja se é sta ku bida ainda. »
Ka passa nem um segundu, ki Amor dja tinha Verdadi na sé brassu. Rostu viradu pa kumpanheiro. Verdadi xinti kel rapiamento. Kel rapiamento di salvasom. Di odju grandi abertu, é djobi Amor. Um olhar cru. Trin trin ! Um olhar profundo.
« Amor favor dam bu calor. Ka bu dexam bai. Nta amau di tanto força kim ka enkontra forma di dexau sabi. E na momento ki djam sta xinti nta despareci ki djam ganha kel força di kontau nha verdadi. »
Amor sta ketu, ta ozerba.
« Amor, bo é unika. Ka bu dexam bai. Djunto nu podi revela pa mundo força di existencia. Mim sem bo, é nada mas di ki um bento. Nos djuntadu, nu podi construi kel lar saudavel e apaziguadu, kel kim nehum homi nest terra ka coraja edifica».
…Verdadi komu expresom mais simplis di Amor.
©Em kriolu 2020 emkriolu.com – Todos direitos reservados CGU
Em kriolu 