Bu ta lembra quando bu mae ta dau kel abrasu cheio de calor, cheio de amor, ta flau : « nha fidju, bo é nha maior rikesa ».

Hoje dja bu sta grandi, longi bu mae. Bu ta ligal, bu ta flal : « mama forti nta xinti falta kel abrasu. Bu amor é nha maior força. Ku bu prisença nta xinti grandi. »

Mae, hoji sta dedicau um poesia, um nota de alegria.

Depos de tantos anos, djam percebi kual é rialmenti valor di mae.

Depos de quedas e vitorias, djam intendi ki lugar bu ta okupa na nha ixistencia.

É ku dor, sufrimentus, surizos e felicidadi ki nu parilha melhor momento di nos vida.

E ku amor, kunfiança e kel special atensom ki nu fazi kumpanheiro intendi kuanto nu ta ama e kuanto nu teni pa du da kumpanheiro.

Nta konta sempri ku bo nha vida e ta spera sempri okupa kel espaço saudavel na di bo.

Kel poesia nta dedicau él. É txoma :

Mudjer e poder, maior forsa di nos universu

Por alem di ser kel pessoa atenta e dedicada

Por alem di ser kel pessoa karinhoza e amorza

Por alem di ser kel pessoa silencioza e capricioza

Por alem di ser kel pessoa desejada e amada

Mudjer, bu foi, bu é e bu ta ser sempri kel joia poderoza

Bu ta carega ku bo maior valoris di universo

Bu ta carega ku bo maior konviksom di nos berço

Bu ta carega ku bo maior forsa di transformasom

Bu ta carega ku bo maior poder di crescimento

E na bo kim ta toma inspirasom pa eleva nha pessoa

E na bo kim ta kunfia pa da kel passo pa frenti

E pa bo kim ta dedica nhas maior lutas

Bu kapacidadi di percibi situasom

Bu forma di partilha bus intuisom

Ta dau tudo forca pa simia mas simenti

Ta dau tudo gara pa enfrenta desafius

Ta dau  tudo poder de lida es mundo

Mudjer, bu foi, bu é e bu ta ser sempri kel joia poderoza

Nta kredita na bus palavras cheio de sabedoria

Nta kredita na bus atos kontagiosa

É ku bus kualidadi ki nu ta kunstroi mundo di hoji

É ku bu fé na igualdadi ki nu ganha legitimidadi

É ku bus passus pa poder ki nu ganha liberdadi 

É ku bus provas di amor ki nu ta ganha credibilidadi

Mudjer bo é poder, bo é maior forsa di nos universo!